بابكر سلك يكتب: العليقي يتشوق للبس النجمة
*كنت قاعد مع صديقي وليد البشرى الهلالابي الملهم.
*هذا الرجل ظل مصدر إلهام لكتير من كتاباتي.
*أثناء ما أنا قاعد معاهو.
*جا بشرى ولدو.
*لابس أحمر بأصفر وفيهو نجمة كمان.
*بشرى ده بالمناسبة مولود يوم الشرميطي جاب الهاتريك في الهلال .
*وكم يحلو لنا أن نطلق على بشرى لقب الشرميطي.
*المهم.
*وليد شاف ولدو لابس الأحمر بأصفر وإنفعل.
*ده شنو اللابسو ده؟.
*أحمر بأصفر؟.
*وفيهو نجمة كمان؟.
*والله أنا أربي عمايلي ما أربي لي مريخابي.
*أمشي عيش مع عمك سلك.
*بشرى ضحك .
*وقال ليهو يا أبوي ده شعار إسبانيا.
*وليد قال ليهو وإسبانيا تلبس نجمة ليه؟.
*بشرى قال ليهو في البطولات الدولية.
*وعشان الناس تتمايز بالتاريخ والإنجاز.
* الشال البطولة بتميز بنجمة .
*شلتها مرتين بتلبس نجمتين.
*شلتها تلاتة بتلبس تلاتة نجوم.
*النجمة دي مابلبسوها ساي.
*ماعندك إنجاز مابتلبس نجمة.
*كان لبستها وأنت صفر الإنجازات بفتحوا فيك بلاغ إحتيال وتملك جنائي والإدلاء بمعلومات كاذبة.
*هنا أنا ضحكت.
*وقلت لوليد.
*عرفت الهلال مابلبس نجمة ليه؟.
*والغريبة العليقي ساكي قصة يلبس الهلال نجمة دي شديد .
*ما خلى إفريقي لابس كدارة ماجابو.
*الأفارقة في الهلال بقوا أكتر من الأفارقة في نهائيات إفريقيا بالكاميرون.
*وحقو السوباط يعمل ليهم نظارة وعمودية.
*الناس ديل بقوا أكتر من ناس البلد .
*لكن قصة يلبسوا نجمة دي أسهل منها قصة نظارة ورقم وطني .
*لبس النجمة ده ماساهل يامحمد عبدالماجد.
*داير ليهو إنجاز.
*لازم تحرك من نقطة السكون الصفرية.
*وإلا حاتكونوا لابسين هلالكم ده ليوم يبعثون.
المهم .
*نحنا مصرين على بحر دار.
*والبحر هايج.
*والبحر بشيل عوامو.
*بحر الحبش ديل جاب ليهو كمان سد نهضة.
*الخوف نبقى في الملية الرابعة والملية الخامسة.
*ونقعد نغني .
*أني أغرق أغرق أغرق.
*ونعود للمسكن.
*نهواهو في كل الظروف .
*وبشوف العليقي جايب مسكنات إحتياطي.
*قال حايستضيف سيكافا.
*سيكافا يامعذابهم.
*أيها الناس.
*إن تنصروا الله ينصركم.
*أها نجي لي شمارات والي الخرتوم.
*معقولة يا والينا.
*معقولة يامبكينا.
*كهربا قاطعة الليل كلو والباعوض شغال فينا.
*غلبتكم نضافتها جيبوا الكهربا يا أخينا .
*على الأقل نشوف مين البعضعض فينا.
*عض الضلمة ده ماحبابو يا والينا.
سلك كهربا
ننساك كيف والكلب قال عض الضلمة برقى لدرجة التحرش لأنو في عض في حتات كده ما حبابو.
وإلى لقاء.
سلك
صحيفة الانتباهة