بقدر ما حاولنا ان ندعو الناس للتمترس تحت القبيلة الواحدة الوطن الام السودان ولتظل قبائلنا وسحناتنا وتراثنا وعاداتنا هى بوتقة اخرى للتمازج والمصاهرة والتعارف
لكن (طالما انو …) الناظر مادبو بجلالة قدره قال ما قال (انحنا كمان) برضو اولاد قبائل ومن حقنا ان ندعمها وان اختلفنا مع الناظر وعمنا (عليو) فى الخطاب والعقلانية والدعوة للوحدة لا دعوة اهل الخرطوم للاستعداد لشيل (البقج) والنزوح غرباً! ودعوة مبطنة للحرب العنصرية كما فهمها الناس باسى واسف شديدين وذلك لقامة الرجلين محلياً وقومياً ولكن لكل جواد كبوة ! وقد كبا الجوادان بلا شك
ولن نجامل
نجي لموضوع اهلي ..
مجلس شورى قبيلة الجعليين يصدر بياناً غاضباً بحسب صحيفة (عدسة الالكترونية) واستاذنك عزيزي القارئ فى نقل البيان نصاً بلا تصرف كما ورد وهو …
فى ظل التعتيم الاعلامي وشح المعلومات وعدم الشفافية الذى تمارسه المؤسسة العسكرية فى حوارها مع بعض الكتل السياسية
نحذر …
من اي حوار يتجاوز الكيانات الاجتماعية فى شمال وشرق ووسط السودان ونؤكد اننا لن نسمح بتكرار تلك الاخطاء القاتلة التى مكنت جهات محددة من السيطرة على مفاصل السلطة والثروة باتفاقات ابرمت تحت غبار الثورة وابعدت غالبية اهل السودان من التمثيل فى الحكم
ونؤكد اننا سوف نقاوم اي حكومة تنتجها مثل تلك الاتفاقيات المشبوهة التى ابعدت اهلنا ومجتمعاتنا فى شرق ووسط وشمال السودان طيلة الفترة المضطربة الماضية
وندعو جماهيرنا للاستعداد للمقاومة الشعبية الكبيرة واسقاط اى اتفاق يتجاوز اهلنا ومجتمعاتنا
وهذا بمثابة رسالة لكل الجهات
التوقيع
احمد الطيب المكابرابي
الامين العام لمجلس شورى الجعليين
(انتهى البيان)
(طيب) كدى خلوني اريح ضهري شوية فى الكرسي وانتح لى كوز موية واقول ليكم … لا لا ياخ كوز الموية الوحيييد ده ما تمشى بعيد .
هل الكلام ده فيهو كلمة جافت الحقيقة المرة التى لا يريدون سماعها؟
على الطلاق ما فيهو (تب)؟
ورغم ان بيان (اهلي) الجعليين جاء مهذباً جداً وهادئاً الا انه (هبش) كل المواجع التى جعلت فئة تستأثر بالسلطة دون بقية مكونات اهل السودان الوسط والشمال والشرق
(واصبر لى جاي ليك فى الكلام) …
البيان لم يسم تلك الفئات لكن اسمعوها منى انا ولد الجعليين المطرطش ده
الحكاية ما واضحة (ماااياهم) ناس سلام جوبا اااى ياخ بتحك فى راسك مالك؟
مش سماهم (الموسوس) حمدوك انهم حركات الكفاح المسلح تجميلاً واستئناساً؟ مش ياهم ؟
اها الجماعة ديل عملوا شنو يا صاحبي؟
بعد اتشكل اوووول مجلس عسكري
لم يأتوا للخرطوم بل ذهبوا لجوبا وتركوا الناس سكارى يومها امام القيادة العامة فرحين بسقوط الكيزان !
فعملوا شنو (سابونا ليك نحن الكيشة ديل) للمايكرفونات والخطب والغناء و نتمايل خلف صاحبنا داك الغنى لعلبة الصلصة بكاءً والحكاية كانت فيها مقالدة رجال وحريم وبكاء ! وحاجات كانت من المهازل بالشكل ده .
ولبدوا هناك وتحت تدبير القحاتة بزعامة الابالسة الشيوعيين فى طبخ اتفاقية سلام (جوبا) المعطوبة . (٢٦٦) صفحة لم تحمل للشرق والشمال والوسط الا فتات الموائد كلها ذهبت لدارفور وجنوب النيل الازرق (واريتهم ادوهم حاجة) !
وعشان يمرروا كلامهم ده واقصد بهم القحاطة (اولاد اللذينا) من كل اقليم او ولاية اختاروا ممثلاً لهم ولو كان مطروداً منبوذاً نكرة ..
والنتيجة كل الاقاليم تبرأت مِن مَن قيل انهم يمثلونها .
فتجمد مسار الشرق والشمال والوسط والشغلانة كلها ما زالت داخل (الفريزرات) بمدينة (جوبا)
اذا الاتفاقية (بقت) بين حملة السلاح يقتسمون فيما بينهم ثروات البلد فى مسخ مشوه معطوب وفهم ناقص
طيب ….
من مثل الحكومة يومها ؟
هو (الخال) فمن اين استمد هذه الشرعية ؟ ووقع البرهان (قال ليك) شاهد ومش عارف الراحل الرئيس التشادي ادريس ديبي و(المستر) سلفا ومناديب عن مصر والسعودية والامارات والامم المتحدة كشهود
واتحداهم كلهم ….
من وقع ومن شهد و من رعي ان يكون قد قرأ كامل بنود الاتفاقية وبمن فيهم السيد (حميدتي)
اتحداهم… وطبعاً (ندى القلعة) خارج هذا التحدي ! متذكر الحفلة دى يا عب باسط (والناس تعييييط) !
ياخ انا لى شهرين ماسك القلم والورقة رايح جايي تكرار بنود عبارات لزجة رقم البند الواحد يشمل كل حروف اللغة العربية لا اقول تفصيلاً بل توهاناً متعمداً حتى اذا ما اخضعت للمراجعة يوماً ما (زهج) المكلف ! من القراءة ناهيك عن فهمها
اتفاقية (جوبا) يا سادتي ….
محلها مزبلة التاريخ قريباً اتفاقية كتبت تحت حراسة البندقية كما يبدو لمن يقرأها فماذا تتوقع لها ؟
وليت اهل الحظوة من الدارفوريين الذين سكبت عليهم سطورها دمعاً سخيناً قد نالهم شيء مما حوته من مكاسب !
مشت وين؟
اسألني يا (عب باسط)
بيان اهلنا الجعليين اشار الى ما سمي (بالتسوية) الجارية بين مركزي القحاطة وبين المكون العسكري (كما يشاع) دون ان يسميها ولكنه طالما حذر فيبدو ان اهلنا (شمو حاجة) بالشكل ده .
لذا ذُيل البيان بانه بيان لكل الجهات اى بيان (للناس كافة) والجعليين لن يلاموا على اسماع صوتهم للكافة وحكاية نجوض الحلل بالليل دى طلعت روحنا والله !
ويجب على كافة كيانات الشرق والوسط والشمال ان تبرز للساحة السياسية سلمياً ويسمعوا صوتهم حتى يجد (عمنا فولكر) فيما يلم من اوراق ورقاً يحمل رأياً مناهضاً لخزعبلاته المزعومة
قبل ما انسى : –
اعتقد البيان والقرطاس والقلم افضل من (الكلام التاني)
فاهمني يا سطى ؟
صحيفة الانتباهة
