حبايبنا (القحاطة ون) من اول امس شايلين الطار مع البرسيم وشغالين يطبلوا بان البرهان الانقلابي (مش ده كلامهم؟) قد وافق على دستور لجنة المحامين التسييرية و(اللى هي) الشيوعية فى ذات (الوكت) لتكون اساساً للحكم لما تبقى من الفترة الانتقالية
وعشان الكلام ده يمشي مع البرسيم عملو شنو؟
خلو (ولدنا) خالد سلك يعقد مؤتمراً صحفياً حول ترسيخ الكضبة او الوهم ده . فبدأ يتحدث وبثقة (لكن معاها شوية لفيتة كده) …
ان الجيش وافق على مقترح الدستور المعطوب وانو (حا) يتم تكوين مجلس عسكري اعلى للامن تحت رئاسة رئيس الوزراء (القحاطى طبعاً) … وخالد (روووح) فى الكلام والاحلام .
فكي منقة ….
برضو طلع من سباته وقال كلام من النوع ده وغيرو وغيرو من حملة الطار القحطاوي زى ود عمنا كمال عمر بتاع الشعبي
ولكن الحقيقة هي ….
ان (عمنا) البرهان (حفظه الله وابقاهو) قال لناس قحت المركزي جيبو مبادرتكم وكتر خيركم وهو يقلب فى الورق (قال ليهم) نحن ندعم كل ما يحقق التوافق الوطنى وما قصرتو يا جماعة و(مداها) للياور بتاعو قال ليهو (التلاجة يا عب باسط)
دي كل الحكاية ….
يعني مبادرة قحت واحد ومبادرة (الارادلة) ومش عارف مولانا الطيب الجد ومبارك الفاضل وكووول المبادرات الاخرى حالياً داخل فريزر القصر !
فلا احد يزايد على انه وحتى الان لم يتم التوافق والاجماع الوطنى المنشود .
(والله بعد ده العاوز يسوق جماعتو بالخلا يبقى ده كلام تاني) !
طيب السؤال المنطقي هو …
طالما ان القحاطة عارفين ان مبادرتهم زيها زى غيرها لزوم الزفة دى شنو وبهذه الكثافة؟
اقول ليك انا …
المصاريف… (ااااي ياخ) المصارييييف يا عمك مش الالية الثلاثية بتاعة (فولكر محفوظ) قاعدة؟ والرباعية برضو فى السوق ؟ ما كمان يا جماعة الناس ديل عشان يحاسبوا مراجعهم لازم يكون فى فواتير وكده
اهاااا ….
زى مؤتمر (ولدنا) خالد سلك ده فاتورة محترمة وجاااهزة ومش عارف كلام فكي (منقة) برضو بجيب حاجة ما بطالة وكده .
فهمتو الحكاية ياجماعة ؟
يعني ما يتم من القحاطة هذه (الايامات) يعتبر موسماً من مواسم السواقة بالخلا ليس إلا
وانتو عارفين كمان المعايش بقت صعبة وكده .
القائد مناوي …
طلع اذكى منهم (ولو انى زعلان منو فى حكاية الاقاشي اقصد الخرفان بتاعت قطر دى)
لكن الرجل بدا لى اكثر تعقلاً قال بعد ان اطلع على مبادرة قحت المركزي قال ما معناه انه (يرحب) بها كغيرها من المبادرات التى يأمل ان تنصهر فى بوتقة الوحدة والتوافق وكلام بالشكل ده يعني (القائد) لم يقل انه يؤيد وفرق بين من يؤيد ومن يرحب
اهاااا …..
قوووموا انتو يا القحاتة طيروا بكلام مناوي وقال ليك (مناوي يدعم) دستور القحاتة مرة واحدة !
دستور لجنة تسييرية المحامين الشيوعيين هو ما يدعمه (المزوراتي) فولكر ولا يمكن القول بان الثلاثية تدعمه واعتقد انه لن تقوم لهذا الدستور المعزول والاقصائى قائمة كونه يكرس لاعادة قحت و(عمهم) فولكر من نافذة الاحداث السياسية بعد ان اخرجهم التاريخ من الباب .
وما يجري او قد تسعى له قحط هو (تطعيم) بلغة كرة القدم هذه المسرحية بلاعبين جدد من (مزاريعهم) داخل بعض الاحزاب الاخرى كالمؤتمر الشعبي و الاتحاديين وانصار السنة وبعض الصوفية وبعض من حزب الامة ليبدو الامر وكأنه اجماع قومي حول دستور محاميي (فولكر)
ولكن ….
هل ستنطلي هذه الحيلة على المكون العسكري ؟ حقيقة لا اعتقد ذلك . فالبرهان رغم عتبنا عليه فى (تقالة كراعو) ولكنه يعي جيداً ما يصرح به .
ايضاً وجود الفريق ابراهيم جابر بعيداً عن الاضواء وامساكه بكافة الملفات الحساسة يدعو للاطمئنان . يضاف الى ذلك تنوير الضباط الاخير الذى تم لرتبة اللواء فما فوق يفهم منه استشعار القيادة بضرورة اتخاذ القرار النهائي حيال المبادرات المطروحة. وغالباً ستكون هناك (مكاوشة جداد) ستحدث قريباً .
قبل ما انسى:-
البرهان : (يا أخوي نجض شغلتك)
صحيفة الانتباهة
