صبري محمد علي (العيكورة) يكتب: كيف تصنع الطلس
الطلس والكذب هما وجهان لعملة واحدة ولكن ما يمتاز به الطلس ان له صوت داوي ومسموع والتسمية كما ذكرت لي خالتي السرة بت عجبين انها جاءت مشتقة من (صحن الطلس) وهو صحن مصنوع من الحديد السميك مطلي بطلاء سميك من البوهية تزينه الرسومات وكلما كان ثقيل الوزن كان جيدا و(بعيش) ومقاوم (للطرقعه) ويحدث صوتا مزلزلا اذا القى به على سطح املس والعجب البلاط
لو ما فاهمني
شوف ليك اقرب حاجة جمبك بتوريك (الطرقعة) معناتا شنو .
طيب نجي …لموضوع صناعة الطلس
اولا …
هذه الشغلانة لابد لها من علم و خبرات و دعنا على وزن (دهابة) مثلا ان نطلق على ممتهني هذه الصنعة (الطلًاسة) بتشديد اللام و على الستات (الطلًاسيات)
(فااا) …
الايامات الفاتو ومنذ ان بدأت الخطوات المباركة في دحر التمرد بدت تنشط هذه الصنعة من (اخوننا) القحاته و (اخواتنا) القحاتيات
فمثلا …
اووول حاجة صنعوا ليهم طلسة كده لكن ما مشت معاهم اكتر من يومين تلاته فقال ليك (الخرطوم غير آمنه) وعلى الناس الخروج لان الجيش يقصف مواطنية بالطيران وكده !
بعد يومين تلاته ….
بدأت طلسة جديدة اسمها الدعامة يتقدمون والدعامة يسيطرون ودي برضو كذبها الواقع لانو الحقيقة كانت (الدعامة يصرخون)
بعد العيد بايام …
وهدوء الاحوال النسبي وعودة الاسواق والمواصلات
الجماعة راسهم شطب …
فقال ليك …
خلينا نشيع ان الحرب بين جيش الكيزان والدعم السريع وكده و الطلسة دي كانت بين (المثقفاتية) منهم فقط ولم تجد حظها من الانتشار سيما وان ذات الطلسة ذكرتها مذيعة لاحدى القنوات لسعادة الفريق البرهان .
فقال ليها (ده كلام ممجوج ولم يعد ينطلي علي احد)
بعد داك …
قال ليك خلينا نركز علي الاخبار العالمية ونشوف لينا مراسل مراسلين يحرروا لينا الشغلانة دي شوية فاظنهم وجدوا من يقوم بالواجب بعد ما (عصروا ليهو الفيها النصيب)
(فاااا) بدأ السكلي والنحيب عبر الجزيرة والحدث والعربية واسكاي نيوز وغيرها و (حكمة الله) يا جماعة تلقى المذيع نضيييف ويلمع لا لابس خوذه في الراس ولا سترة واقية من الرصاص (مااا الدنيا حرب) وبعده يقول ليك نحن تحت ازيز الطائرات والقنابل والدمار وياخد ليهو دنقيرا كده نظام هسى حا تقع فينا .
بعد داك حاولوا ينشطوا ليك (لا للحرب) ولملموا كل تشكيلاتهم الكرتونية تحتها من احزاب وتنسيقيات ومش عارف الدكتور فلان والمهندس فلان وبرضو كان صوت الشعب اقوى (تمرد ويجب إخماده)
(فاااا) …
برضو الطلسة دي ما مشت معاهم كتير ياخي نحن عندنا شعب تفتيحة كيف !
فقال ليك خلينا نشوف بعض نشطاء (الميديا) ونديهم الفيها النصيب ينشروا لينا صور الرعب والاغتصاب و الاختفاء ويعملوا لينا لايفات لقاءات وهمية مع ضحايا افتراضيين
وفعلا …
عملوا شغل كويس جدا لكن سرعان ما فضحتهم (الميديا) المضادة و وعي الشعب الصابر
(ياخ) ديل …..
اصغر شافع يقول ليك (لن يصيبنا إلا ما كتب الله لنا) تقول ليهو فلان ضربوه؟
وشخصيا من ما اقرأ ليك
عاااااجل و الاااااان ومش عارف خبر لا يمكن نفيه وثبت بما لا يدع مجال للشك ومعاها لون احمر كده
بعرف ليك …
الموضوع ده طلس قحاته ساكت
وآخر ما توصلت له تكنلوجيا الطلس كانت (ام بارح)
فقال ليك (إختيار بورتسودان عاصمة بديلة لمدة تلاتة شهور) !! شفتو الطلسة دي كيف؟ لا و قال ليك كمان البنك المركزي زاااتو نقل انظمتة الالكترونية الي هناك .
يا اخوانا ….
القحاته يا طلسو زي الناس يا ما تضايقونا في اكل عيشنا ساي
الشغلانه دي عاوزة فهمممم
صحيفة الانتباهة