صبري محمد علي (العيكورة) يكتب: بطلوا المِلُيس بتاعكم ده
خاص ب [الانتباهة] والمليس بكسر الميم و تسكين اللام لغة في العرف السوداني يقصد به البكش والبلبصة والدهنسة وجميعها تقابلها في اللغة العربية (ركوب الموجة) والاصطفاف مع الاقوي
ونقول مخاطبين بعضا من زعماء الاحزاب السودانية (أس البلاء) ولن نجد حرجا في ان نذكرهم فما كتبوه مبذولا ومتاحا عبر الوسائط
هؤلاء (الملاسيين) …
صمتوا طيلة ايام الحرب الاولي
(آآي نعم لانشك في وطنيتهم)
ولكنهم بعد ان رأوا الكفة تميل لصالح القوات المسلحة كحق مستحق ومدد الاهي وإصطفاف شعبي عظيم انتظم كافة ولايات السودان
فهؤلاء الارزقية قالوا ليك ياولد خلينا (نقدم السبت) عشان نلقى الاحد .
فصاحبنا بتاع (المجد للساتك) الباشمهندس الدقير بدأ يتحدث عن مساع لوقف الحرب ودخول المدنيين كطرف ثالث لتحييد القوات المسلحة والمتمردين عن المشهد السياسي ويسلموها ليهم كمدنيين (باااردة كده) وهذه ذات الرؤية التى يركض بها العملاء حمدوك و طه الحسين بين يوغندا واثيوبيا والامارات هذه الايام . (شفتا كيف)؟
اي بمعني ….
مساواة المنتصر والمهزوم والوطني والعميل و (ادوها لقحت المركزي) !
شفتو الفلاحة دي كيف ؟
وطبعا هذه ورقة محروقة بعد تصريحات الفريق اول البرهان
(حفظهو الله وابقاهو) وتصريحات الفرقاء الكباشي وياسر و الفريق اول ركن المهندس ابراهيم جابر
ياخ لكن …
الاخير ده مكيفني ليك كيف
هندسة ياعمك !
المليسة التانية …
جاءت على لسان الاستاذة اشراقة سيد احمد بإسم حذبها كاحد انشطارات الحزب الاتحادي فى بيان تدعم فيه الجيش وكده
(لاحظوا الكلام ده بعد اكتر من اسبوعين من اندلاع الحرب)
ده كلام يا اشراقة؟
السيد …
مبارك الفاضل برضو (قريت ليهو حاجة بالشكل ده)
السيد مبارك اردول برضو دعم وتغزل في الجيش الايامات الفاتو دي خااالس …
(فاااا) ….
حكاية مد القرعة بالشكل الخجول ده لن تاتي بوزارة ولا غفير حتى .
قول لي انت عاوز يعملو شنو يا استاذ؟
اقول ليك انا …
مش هم بقولوا إنهم احزاب محترمة وعامله فيها ذات سند شعبي وجماهيري عريض وكده؟
خلاس ياخ ….
تطلع جماهيرها وتحشد عضويتها و تدفر ليها قدامها لوري لوريين كده بتاعات سكر وخرفان ويطلعوا للجيش في اي ارتكاز قريب منهم يسلموها ليهو
واللا ياخ تنكر موية ساكت كان افضل من تسويق الكلام والخطب الفارغة وبيانات (الميديا) .
اظن وإن بعض الظن شنو يا جماعة ؟
ان هؤلاء الارزقية ما زالوا يعتقدون ان السودان سيعود لما قبل يوم (١٥) ابريل و(انو) عمنا البرهان بعد كل هذه التضحيات الجسام والشهداء (حا) يفرشا ليهم في شوال وكل زول ياخذ مقاسو)
لا لا يا حبيبي …!
غلطان انتا
ما اعتقده جازما هو ….
بعد ان تضع الحرب اوزارها قريبا بإذن الله .
ان لا حظ لاي حزب فيما تبقى من الفترة الانتقالية مهما كانت درجة (مليسو)
سعادة الفريق كباشي تسمعني؟
(تانيا) اي حديث عن كفاءات سيفتح الباب لهؤلاء الارزقية وكدائس السياسة و وجع قلبنا ديل ان يتسللوا من خلاله مره اخرى داخل المشهد السياسي .
قول لي الحل شنو؟
الحل يا صاحبي
حكومة انتقالية عسكرية (صر)
طبعا (حا) تقول لي و الخبرات والكفاءات يا استاذ مش كده؟
اقول ليك انا معاااك في الحتة دي لكن ….
الخبرات تكون لوكلاء الوزارات اما الوزير فليكن عسكري وصاري وشو كمان
والتجارب كثيرة التي حدثت في عهد الراحل الرئيس نميري وبواكير الانقاذ وكانت من انجح الحكومات التي مرت علي السودان
وقبل ما تقول لي يا استاذ
وطيب ….
ناس سيدي ومولانا والرفيق والزميل والمجاهد وبتاع
ديل حقهم وينو ؟
اقول ليك ايواااا ديل
يمشوا يجهزوا انفسهم للصندوق للانتخابات بس .
طيب …
وناس اتفاق سلام (جوبا)؟
اقول ليك …
مرحليا يتفاهموا معاهم بما لا يتعدي وظيفة مدير شركة او هيئة حكومية ولكن قطعا دون منصب وكيل الوزارة وبرضو يمشوا يتفرغوا هم كمان لقواعدهم لخوض المنافسة الشريفة عبر الاقتراع
مش بقولوا هم احزاب محترمة؟ يللا يورونا شطارتهم و فهمهم في السياسة .
أعتقد ….
ما ينقص هذا المشهد هو …. نزول قطاعات الشعب السوداني للشارع وتفويض الجيش بإستكمال ما تبقى من الفترة الانتقالية
( والسلام على طه الامام).
صحيفة الانتباهة